Tag Archives: Ex

Ngayon na nga ba ang SA WAKAS?

31 Aug

Ano ba itong pakiramdam na parang nakalutang sa alapaap at sa isipan, isang imahe ng kadenang napigtas?

Ano nga ba?

Ano ba itong parang pagluwag ng dibdib pagkatapos tumakbo ng tumakbo na parang may tinatakasan at sa isipan, mga katagang paulit-ulit: “Sa wakas…sa wakas”.

Nagsimula lahat ng niyan nang makita na kitang may kasama nang iba.

Pero nang balikan ko ang araw simula nang makita kita kasama niya at ng araw na huli tayong mag-usap pagkatapos ng mahabang katahimikan…

Kaibigan, nakawala ka na nga ba o kumapit lang sa iba?

Naghihintay na sana sa pagtagal, siya ang makapagpakawala sa’yo sa kadena

Dahil di ko naisip, pinakawalan nga kita sa hawla nating dalawa, pero ang kadenang nagdudugtong sa ating dalawa, kadenang iyong ginawa, hindi mo pa nasisira.

Ang malayang pakiramdam unti-unting bumaba mula sa alapaap. 
Ikaw nga ba’y masaya na o nagpapanggap? 

Kailan mo mahahagilap na hindi ako ang iyong pangarap?

At kailangan ko matatanggap, na hindi ikaw ang aking hanap?

Na ang kalungkutan ay hindi basehan para sa pag-iibigan?

Ang kalungkutan ko’y hindi ang iyong kawalan,

Kun’di ang kakayahan ng puso kong kumawala at maipagkatiwala sa iba ng lubusan. 

Pero ang kapal naman ng aking mukha para sa isiping di ka pa nakawala. Sana nga. Sana nga. 

Sa konting panahon, ako’y nakaramdam ng alapaap sa pag-aakalang ika’y nakatagpo na ng bagong pangarap, nang sa gayo’y ako nama’y mapanatag na ikaw at ako maaari nang bumalik sa pagkakaibigan nang walang masasaktan.

Ngayon na nga ba ang “Sa wakas.”? 

Muli, hihingi ng tawad nang walang wakas.

Advertisements

Hindi Na Muli

8 Jul

Sinabi ko noon,

“Hindi na muli.”

Sinabi ko noon,

na puno ng hapdi.

Sinabi ko noon–

iyon, nang puro hukbi.

Hindi ba muling pipili

ng taong ako’y ikukubli.

Hindi na muling isasantabi

mga pangarap at minimithi.

Hindi na muling magpapaapi

sa taong makasarili.

Kaya sabihin mo sa akin ngayon,

paano ako lilingon–

sa mapait na kahapon na puno ng mga alaalang pilit binabaon?

Kaya sabihin mo sa akin ngayon,

paano mo ako mapapaayon

na balikan natin ang kahapon?